“Shteti, me oligarkët”-Marka: S’bëhet me punëtorin që bie nga skela! Duhen sindikata

Pedagogu dhe aktivisti i ‘Lëvizjes Bashkë’, Jani Marka, është shprehur se gjatë këtij 1 maji ka pasur më shumë persona që kanë dalë në protestë.

Komentet Marka i bëri në emisionin “Now me Erla Mëhillin” në Euronews Albania, ku tha se punëtorët në Shqipëri kanë nevojë për organizim sindikal, në mënyrë që të kenë mbrojtje ndaj pronarëve.

Ai tha gjithashtu se shteti shqiptar duhet të mbështeste më të dobëtin, por sipas tij, këtu ndodh e kundërta dhe shteti bëhet me oligarkët.

“Grupimi jonë që 12 vite më parë kur është themeluar, ka çështjen e punës në qendër të veprimtarisë së vetë. Pasi është e rëndësishme për çdo njeri, të gjithë jetojnë përmes punës, përjashto ndonjë parazit. 1 Maji është ditë simbolike e punëtorëve. Nuk është rasti të bëjmë një protestë specifike apo sektoriale.

Aktivistët tanë kanë qenë edhe te Ministria e Arsimit, edhe te Kryeministria. Vlen për t’u theksuar se është pak i veçantë ky vit. Ky 1 Maj ishte më i larmishëm, kishte më shumë zëra që ishin në shesh, që është diçka normale. Të shpresojmë që vitin tjetër të shumëfishohet numri i njerëzve që zbresin në rrugë.

Punëtorët kanë nevojë për organizimin sindikal. Kjo marrëdhënie është shumë e pabarabartë. Shteti duhet të merrte rolin dhe të mbështeste më të dobëtin. Shteti jonë është me oligarkun që ndërton kulla dhe jo me punëtorin që bie nga skela”, tha Marka.

LEXONI GJITHASHTU:

• “1 Maji”| Po marshonin drejt sheshit Taksim, Policia turke shpërndan protestuesit
• Nikolla mesazh për 1 Majin: Po punojmë për ligje më të mira për botën e punës