Shtyhet me 24 orë ardhja e dozave të vaksinës “Pfizer”

Ministria e Shëndetësisë dhe Mbrojtjes Sociale thotë se 15210 dozat e vaksinës “Pfizer” nuk do të mbërrijnë sot siç ishte parashikuar, por të martën. Sipas Ministrisë, ka qenë vetë kompania ajo që ka konfirmuar këtë vonesë.

“Sapo kemi marrë njoftim nga kompania dhe autoriteti përgjegjës për transportin e sigurt të vaksinës, se sasia e vaksinave Pfizer, e konfirmuar për të mbërritur mbrëmjen e sotme, shtyhet me 24 orë”, thekson ministria. 

Procesi i vaksinimit në Shqipëri aktualisht është përqendruar tek bluzat e bardha dhe tek të moshuarit mbi 80 vjeç. Qarku më i prekur në vend është Tirana, e cila kryeson listën si për rastet pozitive ashtu dhe për numrin e viktimave nga Covid-19.