Shtyhet seanca paraprake për Erion Veliajn, shkak mungesa e një prej avokatëve

Seanca paraprake për dosjen e Erion Veliajt është shtyrë për në datën 12 nëntor. Shtyrja ka ardhur pas mungesës së një prej avokatëve të Veliajt.

Ndërkohë Gjykata e Posaçme legjitimoi avokatin e ri të Veliajt, Artan Gjermeni i cili kërkoi kohë të njihej me aktet. Vetë Veliaj nuk mori pjesë në seancë.

Sipas dosjes hetimore të SPAK, Veliaj akuzohet se është përfshirë në disa raste korrupsioni, pastrim parash, mosdeklarim pasurie, shpërdorim detyre si dhe futje të sendeve të ndaluara në qeli.

Po ashtu edhe bashkëshortja e tij Ajola Xoxa përballet me akuza për korrupsion pasiv dhe gjithashtu për pastrim parash, mosdeklarim pasurie dhe fshehje të të ardhurave.

Veliaj po zhvillon gjithashtu një betejë ligjore pasi u shkarkua nga posti i kryetarit të Bashkisë së Tiranës më 25 shtator, ndërsa Gjykata Kushtetuese pezulloi shkarkimin e tij dhe bllokoi zgjedhjet e parakohshme në Tiranë.

LEXONI GJITHASHTU:

• Sot seanca paraprake për dosjen “Veliaj”, GJKKO vendos nëse çështja kalon për gjykim
• Shtyhet seanca për Ilir Metën, shkak mungesa e avokatit të Kryemadhit