Shtyhet vendimi për Fredi Belerin, çfarë ndodhi gjatë seancës në GJKKO

Është shtyrë gjatë seancës së sotme në GJKKO vendimi për kreyabashkiakun e zgjedhur të himarës, Fredi Belerin. Vendimi do të jepet më 5 mars në orën 13:00.

Gjatë seancës së sotme mbrojtja e kryebashkiakut të zgjedhur të Himarës Fredi Beleri lexoi për më shumë se 3 orë konkluzionet e saj, ku avokati Geni Gjyzari përmblodhi të gjitha pretendimet e tij në 54 faqe. Fokusi ishte kryesisht tek provat ku kërkoi pavlefshmëri dhe papërdorshmëri të të gjitha përgjimeve e vëzhgimeve që janë bërë nga Prokuroria e Vlorës, Policia dhe më pas SPAK. Kalimi i çështjes në gjyq sipas tij, për Fredi Belerin e Pandeli Kokaveshin është i pavlefshëm sepse është bazuar në prova që nuk janë marrë konform ligjit.

“Të gjitha veprimet e policisë janë bërë para se Prokuroria e Vlorës të kishte regjistruar procedimin penal. Dëshmia e Arsen Ramës është e pabesueshme pasi i ka ndryshuar 3 herë deklarimet. U vërtetua edhe në gjykatë se ai është paguar pasi çështja ka ardhur në SPAK. Nuk është vërtetuar se Arsen Rama është takuar me Fredi Belerin, por një person tjetër që ka dëshmuar në gjykatë dhe ka konfirmuar se është ai që shfaqet në pamje. Telefoni i gjetur në një makinë që sipas prokurorisë është e Pandeli Kokaveshit, ky i fundit nuk ka qenë i pranishëm në momentin që është sekuestruar prova, çka ngre dyshime nëse telefoni të jetë i të pandehurit”.

Gjyzari u ndal edhe tek një konstatim i fortë kur tha se Arsen Rama nga datat 8 deri në 12 maj nuk ka qenë në Vlorë por në Himarë, e provuar nga ekspertiza e valëve telefonike, deklarim të cilin e përsëriti edhe në një deklaratë për mediat

Në seancën e kësaj të mërkure, kërkoi të deklaronte edhe vetë Beleri, por relatori Erion Çela tha se për shkak të tejkalimit të orarit zyrtar dhe koha që i duhet trupës në dhomë këshillimi, seanca duhej shtyrë. Ndërkohë i pandehuri tjetër Pandeli Kokaveshi, të cilit iua ndryshua masa pas arrestimit për shkak të gjendjes së rëndë shëndetësore, iu drejtua vetëm me dy fjali Gjykatës.

“Më ka dënuar Zoti më shumë se ç’mund të më dënoni ju. Kërkoi që nëse dënohem të merrni parasysh gjendjen time dhe të vajzës time, nëse shpallem fajtor e kam të pamundur shërbimin e provës për shkak të gjendjes shëndetësore”.

Kujtojmë se SPAK ka propozuar një dënim prej 2.6 vjet burg për Belerin.

Ndërkohë po diskutohet edhe çështja e lejes që Beleri ka kërkuar për t’u betuar në postin që u zgjodh, për të cilën pritet një përgjigje më 19 mars nga Gjykata Kushtetuese e Shqipërisë.

Kryebashkiaku i zgjedhur i Himarës po qëndron në burg që para zgjedhjeve të 14 majit të vitit 2023 , me akuzat për blerje të votave.

LEXONI GJITHASHTU:

• “Beleri’ në Bruksel, Rama indinjohet me zyrtarin grek: Shqipëria nuk është Siberi
• “Greqia bën mirë që insiston për Belerin”, Çani: Raport forcash, pse Rama fiton