Sigurimi i pronës nga tërmeti, Dhoma Amerikane: Duhen përjashtuar disa kategori

Dhoma Amerikane e Tregtisë nuk pajtohet me ligjin qe detyron qytetaret te paguajnë sigurim banese nga tërmetet. Ajo kërkon qe disa pika te rishikohen, vecanerisht ato qe prekin shtresat ne nevoje.

Dhoma Amerikane e Tregtisë kërkon që ligji për sigurimin e detyrueshëm të banesave nga tërmeti të rishikohet. Sipas saj, dokumenti i hedhur për konsultim, përkufizon banesat, por nuk është i qartë me ato që janbë në përdorim të përzier ose për strukturat që janë pjesërisht rezidenciale.

“Këto raste mund të sjellin interpretime të ndryshme dhe mosmarrëveshje gjatë zbatimit. Po ashtu, përkufizimi i “ngjarjes së tërmetit” lidhet me magnitudën mbi 5.0, por nuk specifikohet procesi për njohjen dhe shpalljen zyrtare të saj nga autoritetet, duke krijuar hapësirë për kontestim”.

Një tjetër pikë për të cilën Dhoma Amerikane kërkon përkufizim të qartë, është pjesa e ndërtesave që banohen nga shtresat në nevojë.

“Projektligji e lidh sigurimin e detyrueshëm me aksesin në shërbime të rëndësishme si kadastra apo e-Albania. Edhe pse ky është një stimul i fortë për respektimin e ligjit, refuzimi i shërbimeve bazë për personat që nuk janë në përputhje mund të cenojë parimin e proporcionalitetit, veçanërisht për shtresat vulnerabël. Nevojiten përjashtime ose lehtësi për kategori të caktuara të popullsisë”.

Fondi për Tërmetet do të administrojë primet e sigurimit dhe dëmshpërblimin. Sipas Dhomës Amerikane të Tregtisë, krijimi i Fondit për Tërmetet si shoqëri aksionare publike është pozitive, por ligji i jep Ministrisë së Financave shumë të drejta mbi emërimet dhe mbikëqyrjen, duke ngritur dyshime mbi pavarësinë e vërtetë të Fondit.

LEXONI GJITHASHTU:

• ‘Po dëmtohet turizmi’, Dhoma Amerikane: Shkak mungesa e ujit dhe ndotja
• Shfaqet “Horizontet e kureshtjes”, historia sekrete e turizmit shqiptar në komunizëm