Silva Caka u emërua zv.Ministre në qeverinë Rama, reagon Partia e Lirisë

Silva Caka është emëruar zëvendësministre e Brendshme në qeverinë e Edi Ramës, duke shënuar një rikthim në arenën politike, por këtë herë në krahun e mazhorancës. Ky emërim vjen pas një periudhe të gjatë mungese nga skena politike, pasi Caka kishte dhënë dorëheqjen nga Partia e Lirisë më shumë se një vit më parë, me arsyetimin se do të ndiqte studimet në Shkollën e Magjistraturës.

Por emërimi i saj në qeveri ka ngjallur reagime të menjëhershme nga Partia e Lirisë. Zëdhënësja e kësaj force politike, Jasmira Memelli, publikoi një video të vjetër ku Caka kritikon ashpër ish-kolegët e saj që ishin bashkuar me qeverinë Rama, duke i akuzuar për lidhje me “afera korruptive”.

“Ka gjetur veten me Edi Ramën, me të gjitha ato aferat e tij korruptive. Andej nga anët e mia i thonë që ka gjetur tenxherja kapakun”, shprehej dikur Silva Caka në atë deklaratë, e cila tani është risjellë në vëmendje nga Partia e Lirisë.

Në një reagim të gjatë në rrjetet sociale, Memelli shkruan se dorëheqja e Cakës nga Partia e Lirisë ishte vetëm një justifikim për një bashkëpunim të ardhshëm me qeverinë.

“Në fakt rezultoi aplikim për në ‘Shkollën’ e Korrupsionit, Krimit dhe Vesit”, shkruan ajo.

Zëdhënësja e PL-së e cilësoi këtë hap të Cakës si një braktisje të vlerave dhe parimeve për një “karrige të pavlerë” në qeveri, duke shtuar se këto janë zgjedhje personale që “flasin më shumë se çdo fjalë”.

LEXONI GJITHASHTU:

• Silva Caka braktis Partinë e Lirisë, emërohet zv.ministre e Brendshme
• Shpërthim në një fabrikë çeliku në Pensilvani, dhjetëra të plagosur