Situata e gripit, ministrja Koçiu: Ka shtim të rasteve, por nuk jemi në epidemi

Gripi ka rritur ndjeshëm numrin  e personave të prekur në javën e fundit, por vendi nuk është në epidemi. Konfirmimi vjen nga ministria e Shëndetësisë, Albana Koçiu e cila gjatë një intervistë dhënë për Thimi Samarxhiun në Euronews Albania, tha se situata epidemiologjike është normale për stinën.

“Kemi një rritje të numrit të infeksioneve respiratore. Në raport me vitin e shkuar ka një rritje të rasteve, por nuk jemi në situatë epidemie”, tha Albana Koçiu, ministre e Shëndetësisë.

Përpos shifrave të rritura të të sëmurëve që shkojnë në shërbimet e urgjencës apo tek mjeku të familjes, që tashmë janë mbi 19 mijë persona në javë, ministrja Koçiu, tha se shtrimet në spital nuk janë shtuar.

“Nuk kemi hospitalizime që rrisin ndjeshëm kapacietet e spitaleve, kemi një shtim të vizitave por janë raste që trajtohen shumë mirë në shtëpi duke ndjekur këshillat e mjekëve”, shtoi Koçiu.

Edhe pse jemi thuajse në mesin e sezonit të gripit, apeli i ministres si dhe shumë ekspertëve drejtohet tek vaksinimi.

“Kemi një përdorim në masën 76% të vaksinave të kryera. Thirrja që do bëja është të vaksinoheni si një masë paraprake mbrojtëse ndaj virozve të stinës”, tha ministrja e Shëndetësisë, Albana Koçiu.

Për të parandaluar fluksin e shtuar të fëmijëve në urgjencën e QSUT, në 6 qendra shëndetësore në Tiranë, janë të hapura shërbime urgjence 24 orëshe që iu vijnë në ndihmë banorëve të zonës.

LEXONI GJITHASHTU:

• Rama dhe Koçiu në Poliklinikën e re në Shkodër: Përfitojnë 200 mijë qytetarë
• Gripi i shpendëve edhe në Gjirokastër, asgjësohen 20 pula në fshatin Valare