Situatë e rënduar nga moti në Pogradec, fshatrat e Dardhasit pa energji elektrike

Pas rreshjeve të shumta dhe situatës së keqe të motit që ka prekur vendin tonë për disa ditë, në Njësinë Administrative Dardhas, Bashkia Pogradec, sipas informacionit të deritanishëm, energjia elektrike mungon në të gjitha fshatrat e zonës.

Sakaq, situata është rënduar edhe nga rrëshqitjet e dherave, të cilat kanë sjellë bllokimin e disa akseve rrugore.

Pas rrëshqitjes së djeshme që bllokoi rrugën kryesore, probleme të ngjashme janë konstatuar edhe në aksin Kakaç-Grunjas, ku rruga është bërë e pakalueshme. Rrëshqitje dherash ka edhe në fshatrat Baribardhë dhe Zall Torrë, ku këtë mëngjes qarkullimi i mjeteve është plotësisht i pamundur.