Deputetja e PS: Protesta në përgjithësi qytetare, vajtja në Rinas nuk ishte një imazh i mirë

Deputetja e Partisë Socialiste, Ilva Gjuzi, e ftuar këtë të mërkurë në emisionin Now me Erla Mëhillin, ka komentuar protestën qytetare e cila sot hyri në ditën e saj të 18-të. Ajo u shpreh se për sa kohë protesta mbetet në linjat e një të drejte qytetare në një shtet demokratik, ajo është shumë e mirë, por shtoi se brenda saj ka rryma që dëmtojnë vetë qëllimin e tubimit.

Gjuzi, sakaq, u ndal veçanërisht te marshimi i fundit, ku qytetarët u orientuan drejt autostradës Tiranë-Durrës dhe më pas drejt aeroportit, duke e cilësuar atë si një lëvizje që nuk përfaqëson qytetarët e thjeshtë.

 “Protesta për sa kohë që mbetet në linjat e një të drejte qytetare në një shtet demokratik, është shumë e mirë. Mendoj që ka rryma aty brenda që nuk i bëjnë mirë as vetë protestës.

Eventi që ndodhi para disa ditësh, para dy netësh, me rrugëtimin drejt një infrastrukture kritike, në një nga aksat më të rëndësishme të vendit, mendoj që nuk qe nga ata qytetarët që janë realisht aty për të protestuar në atë formë. Do të thotë që nuk është një grup homogjen në krye të kësaj gjëje.

Kjo është një protestë e cila nisi për një investim, nisi dhe u bë politike më pas.

Nuk e di sa politike është bërë në kushtet për ata që e nisën. Për ata që e nisën, janë ende aty. Ata që e nisën nuk e kaluan në këtë nivelin politik, pra e harruan se për çfarë e nisën. Nuk u intereson më zhvillimi dhe transparenca e zhvillimit. Pra, nuk jemi në një grup homogjen që kërkon një gjë të gjithë njëzëri. Kemi disa grupe që unë mendoj, në forma të ndryshme, po e përdorin për interesa, qëllime dhe objektiva të ndryshme”, u shpre ajo.