“S’ka korrupsion te Sterilizimi”, avokati: SPAK luftë frontale, heton çdo kallëzim

Gjykata e Posaçme Kundër Korrupsionit dhe Krimit të Organizuar caktoi masën e sigurisë “Detyrim Paraqitje”, nën akuzën e “Shpërdorimit të detyrës” për koncesionin e sterilizimit për ish-ministrin e shëndetësisë Ilir Beqaj. Atij nuk i lejohet të largohet nga territori i Shqipërisë dhe duhet të paraqitet çdo të premte në policinë gjyqësore.

Avokati Gentian Rumano tha në emisionin Review në Euronews Albania se koncesioni i sterilizimit jo vetëm që nuk ka korrupsion, por është një procedurë e kryer konform të gjitha standardet e ligjit dhe një sukses për shëndetësinë.

Sipas tij, hetimi i këtij koncesioni vjen për faktin se SPAK i ka hapur luftë frontale korrupsionit dhe heton çdo kallëzim kur bëhet fjalë për  shuma të mëdha parash publike.

“Dyshimet të çojnë drejt akuzës për korrupsion, ndërkohë për një pjesë që e njeh dosjen jo vetëm që korrupsion nuk ka, por që bëhet fjalë për një procedurë që ka qenë tërësisht e domosdoshme, që është realizuar konform të gjitha standardeve të ligjit, një procedurë e nevojshëm që ka rezultuar shumë  e suksesshme për shëndetësinë. Ky hetim vjen nisur nga mënyra si po operohet nga SPAK këto dy vite e fundit; SPAK ka hapur një luftë frontale ndaj korrupsionit dhe për çdo kallëzim që paraqitet i nënshtrohen një hetimi të detajuar deri në zbardhjen e tyre. Koha do ta tregojë se prokuroria ende po heton, është në hapat e dytë, për të çuar drejt zgjidhjes këtë çështje por ka edhe hapa të tjerë. Unë mendoj në cilësinë e avokatit, dosjen s’e shohim dot me detaje, kemi lexuar vetëm 2 vendime të gjykatës”, tha avokati.

LEXONI GJITHASHTU:

• GJKKO i caktoi masë sigurie, reagon për herë të parë Ilir Beqaj
• “Hetimi për Beqajn nuk është mbyllur”, ish-prokurorja: Gjithçka mund të ndryshojë