Skocia goditet nga stuhia, anulohet lëvizja e trenave, bllokohen rrugët

Autoritetet në Skoci anuluan lëvizjet e trenave, mbyllën rrugë e parqe dhe paralajmëruan qytetarët që të bëjnë kujdes pasi një stuhi e rrallë vere, me erëra shkatërruese, do të godasë veriun e Britanisë.

Zyra Meteorologjike në Mbretërinë e Bashkuar shpalli alarmin në nivelin “portokalli” për shkak të erërave që pritet të mbërrijnë nga stuhia “Floris”, që do të thotë se ekziston rreziku potencial ndaj jetës së njeriut, sidomos nga valët e mëdha në zonat bregdetare.

Agjencia deklaroi gjithashtu se erërat mund të arrijnë një shpejtësi prej 137 kilometrash në orë, të shoqëruara nga shira të dendura.

Stuhia po e godet vendin në kulmin e sezonit turistik, kur qindra mijëra njerëz marrin pjesë në festivalet e shumta që mbahen në kryeqytetin Edinburg.

Edinburgh Military Tatto, një nga eventet kryesore turistike, i pasur me muzikë dhe ushqime u anulua ditën e hënë për shkak të motit të keq.

Nga ana tjetër, kompanitë hekurudhore anuluan shërbimet në pjesën dërrmuese të vendit. Të njëjtën gjë bënë edhe tragetet.

Stuhia “Floris”, një emër i vendosur nga autoritetet meteorologjike, mund të godasë edhe pjesë të Irlandës së Veriut, Uellsit dhe Anglisë veriore.

Zyrtarët u bënë thirrje qytetarëve që të tregohen të kujdesshëm nëse ndërmarrin udhëtime dhe ta konsiderojnë atë një “udhëtim dimri” e jo vere.

LEXONI GJITHASHTU:

• Kroacia përgatitet për një stuhi të fortë, autoritetet publikojnë rekomandimet
• Stuhi e fortë në Slloveni, mijëra njerëz pa energji elektrike në Lubjanë