Stano: Arrestimi i zyrtarëve policorë të Kosovës nga Serbia, shqetësues

Zëdhënësi i Bashkimit Evropian, Peter, Stano, tha për Radion Evropa e Lirë të premten se ngjarjet e fundit, që kanë të bëjnë me ndalimin e zyrtarëve policorë të Kosovës në Serbi, janë shqetësuese.

Serbia, sipas autoriteteve kosovare, i ndaloi dhjetë zyrtarë policorë të Kosovës së fundmi, në mesin e të cilëve edhe një zëvendësdrejtor të Policisë së Kosovës me kombësi serbe. Që të gjithë u liruan deri më 18 prill.

Policia serbe kishte thënë se ata ishin dërguar në mbajtje për “kontrolle sigurie”.

Duke nënvizuar se të gjithë zyrtarët policorë janë liruar tashmë, Stano tha për REL-in se “askujt nuk mund t’i hiqet liria, përveç nëse është e arsyeshme dhe në përputhje me procedurën e përcaktuar me ligj”.

“Për më tepër, Marrëveshja për lirinë e lëvizjes e arritur në kuadër të dialogut me mbështetjen e BE-së përcakton parametra të qartë për hyrjen dhe daljen e qytetarëve të Kosovës në dhe nga Serbia, dhe ajo duhet të respektohet”, tha Stano.

Ai shtoi se BE-ja pret që palët në dialog të shmangin çdo lëvizje që mund të kërcënojë sigurinë dhe stabilitetin dhe ta sigurojnë një mjedis të përshtatshëm për zhvillimin e dialogut.

Më 17 prill, sipas autoriteteve në Kosovë, Serbia i ndaloi mbi 1.400 kosovarë për më shumë se 20 orë në pikat kufitare të saj me Kroacinë dhe Hungarinë, të cilët po kalonin transit nëpër Serbi.

Qeveria e Kosovës këto veprime i cilësoi si hakmarrje e Serbisë ndaj mbështetjes nga Asambleja Parlamentare e Këshillit të Evropës për anëtarësimin e Kosovës në këtë organizatë.

Serbia i mohoi akuzat, duke thënë se vonesat u shkaktuan nga masat shtesë të sigurisë në kufi, dhe se lëvizja e qytetarëve kosovarë “nuk është kufizuar”.

LEXONI GJITHASHTU: 

• Stano: Kosova dhe Serbia nuk do përparojnë drejt BE, nëse s’i zbatojnë marrëveshjet
• Peter Stano për dialogun: Marrëveshja është e detyrueshme për të dyja palët