Sterilizimi/ Biznesmeni Rrapaj shoqërohet me pranga në duar të dëshmojë në komision

Biznesmeni Ilir Rrapaj, i përfshirë në skandalin e koncesionit të sterilizimit, është shoqëruar me pranga në duar në ambientet e Kryesisë së Kuvendit për të dëshmuar para Komisionit Hetimor të Shëndetësisë. Rrapaj, i cili u arrestua më 16 gusht 2024 me urdhër të Prokurorisë së Posaçme, akuzohet për abuzime me koncesionin e dhënë në vitin 2015 për shërbimet e sterilizimit në spitale, një kontratë me vlerë afërsisht 100 milionë euro.

Në ora 18:00, për të dëshmuar është thirrur edhe partneri italian i Rrapajt, Umbro Staccini, i cili përfaqëson kompanitë italiane partnere në projekt. Staccini dhe Rrapaj janë ortakët kryesorë të “SaniService,” bashkimi i kompanive që fitoi kontratën për shërbimet e sterilizimit nëpër spitale shqiptare.

Gjithashtu, këtë të hënë do të dëshmojë në komisionin hetimor dhe ministrja e Bujqësisë Anila Denaj, ish-drejtoresha e Fondit të Sigurimit të Detyrueshëm të Kujdesit Shëndetësor në kohën kur koncesioni u miratua. Denaj ka shprehur kundërshtime të forta ndaj çmimeve të larta të parashikuara në kontratë dhe ka paraqitur ankesa zyrtare.

Koncesioni i sterilizimit, një projekt 10-vjeçar i dhënë nga qeveria shqiptare për rreth 100 milionë euro, iu dha konsorciumit të drejtuar nga Rrapaj me kompaninë e tij “Investital LLC” në bashkëpunim me partnerët italianë. Ky projekt është kthyer në një objekt hetimi për abuzimet e dyshuara dhe përdorimin e fondeve publike për përfitime private.

Në lidhje me këtë rast, përveç biznesmenit Rrapaj, është arrestuar edhe ish-zëvendësministri i Shëndetësisë, Klodian Rjepaj, i cili dyshohet se ka pasur rol në aprovimin dhe menaxhimin e kontratës së sterilizimit. Nën hetim për këtë koncesion është dhe ish-ministri i Shëndetësisë Ilir Beqja, i cili është arrestuar nga SPAK për çështjen e akuzimit me fondet e SASPAK.

LEXONI GJITHASHTU:

• PD kërkon shtyrjen e afatit të komisionit të “Sterilizimit”: Dëshmitarët avullojnë
• Debate te Sterilizimi, Vokshi shkul mikrofonët! Deputetët e PS: Thirrni ambulancën