Stojkoviç: Janë 10 serbë që kanë vdekur në sulmin terrorist në Kosovë

Numri i serbëve të vrarë gjatë sulmit terrorist ndaj Policisë së Kosovës ka shkuar në 10, sipas avokatit serb Çedomir Stojkoviç. Përmes një postimi në Tëitter ai pretendon se ka edhe të plagosur tjerë në Serbi: “Sipas informacioneve të mia, të paktën 7 por me shumë gjasa 10 serbë të armatosur kanë humbur jetën dje në një sulm terrorist ndaj policisë së Kosovës. 3 trupa janë gjetur në vend. Pjesa tjetër e trupave janë tërhequr drejt Novi Pazarit. Ka edhe të plagosur që tani ndodhen në Serbi”, tha Stojkoviç.

Të arrestuarit në Banjskë të Zveçanit, që dyshohet se ishin në kontakt me sulmuesit e Policisë së Kosovës, kanë shtetësi të Serbisë, konfirmon prokurori i Prokurorisë Speciale të Kosovës, Naim Abazi.

Ai shton se disa nga të arrestuarit, përveç nënshtetësisë serbe, kanë edhe dokumente të Kosovës, por nuk specifikon se sa prej tyre kanë të tilla.

Prokuroria Speciale e Kosovës tha se të arrestuarve u është caktuar tashmë masa e ndalimit prej 48 orësh dhe se ata dyshohen për një sërë veprash, përfshirë “sulm kundër rendit kushtetues të Republikës së Kosovës”, “përgatitje të veprave terroriste” dhe “armëmbajtje pa leje”.

Duke folur në një konferencë për gazetarë drejtori i përgjithshëm i Policisë së Kosovës, Gazmend Hoxha, tha se hetimet për të arrestuarit janë duke vazhduar.

“Sa i përket identifikimit të personave që kanë qenë prezentë, është duke u bërë një punë e madhe, por, për momentin, informacionet në këtë drejtim nuk mund t’i ndajmë me publikun”, tha Hoxha.

Sipas burimeve per Radion Europa e Lirë brenda spitalit të Novi Pazarit janë disa nga sulmuesit duke u trajtuar aty. Megjithatë, burimi nuk ka mundur ta thotë numrin e saktë dhe as të japë informacione për gjendjen e tyre shëndetësore.

LEXONI GJITHASHTU: 

• Paralajmëroi futjen e armatimeve në kisha, apeli i deputetes britanike për Kosovën
• Sulmi në Veri, Zotaj: I mirëplanifikuar, serbët kishin ambulancat në kufi
• Video| Pamjet me dron kur terroristët serbë largohen me vrap mes pyjeve