Studenti nga Tetova e transformon në moderne makinën e vjetër polake, përmes një sistemi elektronik

Kjo makinë është prodhim i vitit 1990, por sistemi elektronik i saj nuk dallon shumë nga autoveturat moderne. Për ta ndezur nuk ka nevojë për çelës, si shumica e automjeteve të tjera.

Studenti i mekatronikës nga Tetova, Adem Ameti ka krijuar një pajisje me të cilën këtë makinë të vjetër e ndez përmes përplasjes së duarve… me Bluetooth… me kartë… po ashtu edhe me kod. Idenë e fundit e ka marrë pikërisht nga filmi “Transporter”.

“Ideja më erdhi duke qenë në studime në Turqi. Bisedonim me një kolegë a mund ta bëjmë, dhe e bëmë, funksionoi. Vetura është e vitit 90-të se kishim shumë problem pasi që edhe praktikën e elektrikës e kam profesion dhe me diplomë, prandaj se kam patur problem montimin e kësaj pajisje, apo shfrytëzimin e pajisjeve të reja te pjesa e kësaj. Jam edhe student i mekatronikës dhe i di se si funksionojnë këto pajisje, programimi i tyre dhe pajisjet e reja që kombinohen me pajisjet e vjetra”, tregpn studenti.

Adem Ameti e ka blerë një makinë Fiat polak” (makinë e prodhuar në Poloni me licencë nga Fiatit) në gjendje shumë të keqe, madje as nuk ndizej, por me dhuntitë e tij e ka shndërruar në një automjet të lakmuar për shumëkënd.

“Ndihmë financiare kam prej prindërve, ndërsa ndihmë për pajisjet jam munduar të vetë ta kombinoj të gjithën. Pjesët që I kam përdorur kanë ardhur prej jashtë, prej Kine, prej Ali Ekspresit që porosisim, pasi që edhe kushtojnë më pak….”, shprehet studenti.

Adem Ameti ka vizion edhe për risi të tjera në fushën ku studion, por për këtë shpreson të mbështetet edhe nga shteti.