Sipas një studimi të ri, bërthama e Tokës mund të ketë ndaluar së rrotulluari apo edhe të ketë ndryshuar rrotullimin e saj dhe tani po shkon prapa, shkruan Euronews.
Bërthama e planetit tonë përbëhet nga një shtresë e jashtme e metalit të lëngshëm dhe një shtresë e brendshme prej metali të ngurtë që është rreth 70 për qind e madhësisë së Hënës. Në përgjithësi besohet se bërthama rrotullohet në drejtim të kundërt të akrepave të orës kur shikohet nga Poli i Veriut.
Megjithatë, një studim që analizoi të dhënat e valëve sizmike gjatë 60 viteve të fundit nga studiues në Universitetin e Pekinit në Kinë arriti në përfundimin se rrotullimi i bërthamës ndaloi rreth vitit 2009 dhe më pas rifilloi, por në drejtim të kundërt.
Xiaodong Song dhe Ji Yang, të cilët janë autorët e studimit, deklarojnë se cikli i plotë i rrotullimit (në një drejtim, pastaj në drejtimin tjetër) i kësaj lëkundjeje zgjat rreth 70 vjet.
“Unë mendoj se bërthama, në lidhje me sipërfaqen e Tokës, rrotullohet në një drejtim dhe më pas në një tjetër”, i thanë ata AFP.
Sipas tyre, ndryshimi i fundit i rotacionit para vitit 2009 ka ndodhur në fillim të viteve 1970 dhe tjetri, besojnë ata, pritet në mesin e viteve 2040.
LEXONI GJITHASHTU: