Sulmi rus ndaj ambasadës shqiptare në Kiev, reagon Ministria e Jashtme

Mbrëmjen e djeshme, Rusia ndërmori një tjetër sulm ajror mbi kryeqytetin e Ukrainës, duke shkaktuar dëme të konsiderueshme në disa zona të Kievit. Mes godinave të prekura nga bombardimet është edhe ajo ku ndodhet ambasada shqiptare.

Ministria për Evropën dhe Punët e Jashtme e Shqipërisë ka reaguar menjëherë, duke dënuar ashpër këto sulme, të cilat i cilëson brutale dhe të papranueshme. Në deklaratën zyrtare, MEPJ konfirmon dëmtimin e fasadës së jashtme dhe disa hapësirave të brendshme të ambasadës shqiptare, ndërsa theksohet se për fat të mirë nuk ka pasur të lënduar, por vetëm dëme materiale.

“Një seri sulmesh ajrore të Federatës Ruse tronditën Kievin, duke dëmtuar pjesërisht godinën ku ndodhet ambasada jonë dhe disa misione të tjera diplomatike. Ky akt i pakuptimtë përbën një sulm të drejtpërdrejtë ndaj themeleve të diplomacisë ndërkombëtare. Paprekshmëria e misioneve diplomatike dhe mbrojtja e personelit të tyre janë parime të panegociueshme, të cilat duhet të respektohen plotësisht,” thuhet në deklaratën e Ministrisë.

Zëdhënësi i Ministrisë së Jashtme të Ukrainës, Tykhy, njoftoi se si pasojë e sulmeve, janë dëmtuar gjashtë ambasada të huaja, përfshirë ato të Shqipërisë, Argjentinës, Palestinës, Maqedonisë së Veriut, Portugalisë dhe Malit të Zi, të cilat ndodhen në të njëjtën ndërtesë.

LEXONI GJITHASHTU:

• Bombardimet ruse godasin Ambasadën Shqiptare në Kiev
• Seuli: Të paktën 100 ushtarë koreano-veriore janë vrarë në Ukrainë