Ministri në detyrë i Punëve të Brendshme Xhelal Sveçla theksoi se sulmi terrorist në Banjskë më 24 shtator 2023 vazhdon të mbetet një çështje e pazgjidhur dhe kryesit e krimit janë ende të arratisur.

Ai këto komente i bëri sot në forumin e ministrave të brendshëm në kuadër të procesit të BRDO-s, ku të pranishëm ishin edhe komisionerja për Zgjerim Marta Kos dhe komisionari për Punë të Brendshme dhe Migrim Magnus Brunner, shkruan KosovaPress.

Ky forum u mbajt me fokus në forcimin e bashkëpunimit me qëllim të luftimit efikas të terrorizmit dhe trafikimit me qenie njerëzore.

Në fjalën e tij, Sveçla theksoi rezultatet në luftën ndaj terrorizmit por edhe sfidat që kemi në këtë drejtim për shkak të sulmeve të vazhdueshme të Serbisë që të destabilizojë situatën e sigurisë në Kosovë.

Më 24 shtator 2023 në Banjskë, një grup i armatosur i udhëhequr nga Milan Radoiçiç sulmoi Policinë e Kosovës, ku si pasojë mbeti i vrarë Afrim Bunjaku.

Radoiçiç pranoi organizimin e sulmit, pas të cilit iku në Serbi ku vazhdon të qëndrojë i lirë edhe pse Interpoli e ka vendosur në listën e personave të kërkuar.

LEXONI GJITHASHTU:

• Analisti serb: Vuçiç mund të përdorë grupin e Banjskës kundër protestuesve nesër
• Kush janë dy serbët e përmendur nga Kurti për sulmin në Banjskë