Tabaku për progres-raportin: Thotë qartë se administrata është e politizuar

Këtë të enjte pasdite në Parlament ka folur deputetja e PD-së, Jorida Tabaku, lidhur me progres-raportin e BE-së për Shqipërinë. Sipas Tabakut, progres-raporti nuk ishte aq pozitiv sa ka thënë mazhoranca. Deputetja ka renditur disa çështje duke i lexuar nga progres-raporti gjatë fjalës së saj në Kuvend.

“Nuk na heq dot të drejtën ne si opozitë për të lexuar raportin ashtu siç ishte. E zeza mbi të bardhë. Së pari, progres-raporti thotë se zgjedhjet nuk fitohen me ide, por me pushtet, dhe këtë nuk e thotë opozita, por një pjesë e konsiderueshme e raportit që e konsideron votën jo të lirë. Shqipëria zhvilloi zgjedhje të mira, por jo të ndershme. Së dyti, për integrimin nuk mjaftojnë premtimet, por çdo reformë të jetë e besueshme dhe të zbatohet. Nuk ka nevojë për propagandë. Kuvendi nuk ka kontroll mbi qeverinë, thuhet në progres-raport. E për më tepër, për administratën publike, progres-raporti flet për një administratë publike të politizuar dhe të anshme,” – tha Tabaku.

LEXONI GJITHASHTU:

• Veliaj fitoi në Kushtetuese, e komenton Jorida Tabaku: Çorba po gatuhet
• Tabaku i kërkon Peleshit përsëritjen e seancës së programit: Mos e mbani këtë njollë