Të akuzuar për shkelje në tendera, GJKKO jep vendimin për 10 të pandehur

Gjykata e Posaçme e Shkallës së Parë për Korrupsionin dhe Krimin e Organizuar ka shpallur vendimin përfundimtar për një çështje që përfshinte dhjetë të pandehur, të akuzuar kryesisht për shkelje të barazisë në tendera publikë dhe falsifikim dokumentesh.

Në përfundim të procesit gjyqësor të zhvilluar me rregullat e gjykimit të zakonshëm, trupa gjykuese e përbërë nga gjyqtarët Irena Gjoka, Erjon Çela dhe Rudina Palloj shpalli fajtorë katër të pandehur, ndërsa gjashtë të tjerë u shpallën të pafajshëm.

Ndër personat e dënuar ishte ish-drejtoresha e Autoritetit Rrugor Shqiptar (ARRSH), Sonila Qato, e cila u gjet fajtore për veprën penale “Shkelja e barazisë në tendera”. Ajo u dënua me 6 muaj burgim, por dënimi u pezullua dhe iu konvertua në 60 orë punë në shërbim të komunitetit, që duhet të përmbushet brenda një periudhe 6-mujore, nën mbikëqyrjen e Shërbimit të Provës.

Të njëjtin dënim me burgim të pezulluar dhe punë në interes publik e morën edhe tre të pandehur të tjerë: E.G, E.S dhe S.P.

Ndërkaq, gjashtë të akuzuarit e tjerë u shpallën të pafajshëm për akuzat që rëndonin mbi ta, përfshirë edhe veprën penale të “falsifikimit të dokumenteve”.

Më herët, Prokuroria e Posaçme kishte kërkuar dënimin me 1 vit burg për Sonila Qaton, duke argumentuar se ajo, në bashkëpunim me vartësit e saj, kishte favorizuar një kompani në tenderin për ndërtimin e tunelit të Skërficës në segmentin rrugor Kardhiq–Delvinë.

Vendimi i gjykatës mund të apelohet brenda 15 ditëve në Gjykatën e Posaçme të Apelit për Korrupsionin dhe Krimin e Organizuar.

LEXONI GJITHASHTU:

• Zjarri përfshin parkun e Llogorasë, në rrezik pylli i pishave
• E rëndë në Krujë, babai përplas aksidentalisht për vdekje të bijën 4-vjeçare