Të dhënat shëndetësore konsiderohen sensitive ndaj edhe Zyra e Komisionerit për të Drejtën e Informimit dhe Mbrojtjen e të Dhënave Personale ka kryer një hetim administrativ në qendra shëndetësore të kujdesit parësor apo të specialiteteve për të parë se sa ligji zbatohet.

“Është një fushë që ne duhet të marrim më shumë masa dhe të tregojmë më shumë kujdes, është një situatë tërësisht e re që do vijë me miratimin e legjislacionit të të dhënave personale”, thotë Besnik Dervishi, komisioneri për të Drejtën e Informimit dhe Mbrojtjen e të Dhënave Personale.

Kryetari i Prezencës së OSBE në Shqipëri vuri theksin tek ndikimi që ka tek pacientët nëse të dhënat në lidhje me sëmundjen, adresën, numrin e sigurimeve shëndetësore dhe shoqërore do të bëhen publike.

“Nëse zbulohen ose vidhen të dhëna të tilla ndikojnë drejpërdrejtë në privatësinë, sigurinë dhe mirëqenien e pacientëve dhe dëmtojnë besimin e publikut në kujdesin shëndetësor”, shprehet Michel Tarran, kryetar i Prezencës së OSBE në Shqipëri.

Në të gjithë vendin janë 360 qendra shëndetësore me 2000 ambulanca që janë në shërbim të pacientëve, dhe që do të duhet të jenë të kujdesshëm në ruajtjen e të dhënave.

Deklarata e konfidencialitetit ishte një ndër rekomandimet e komisionerit, i cili gjithashtu ka kërkuar edhe trajnimin e personelit mjekësor që merret me të dhënat e pacientëve, parashikimin e afateve konkrete për mbajtjen e të dhënave personale të individëve, marrjen e masave për kryerjen e anonimizimit, arkivimit dhe/ose shkatërrimit të të dhënave si dhe  informimin e qytetarëve për prezencën e sistemit të video-survejimit në mjediset e qendrave shëndetësore, në mënyrë që t’u jepet mundësia të njihen me të drejtat që gëzojnë dhe mundësinë e ushtrimit të tyre në praktikë.

LEXONI GJITHASHTU:

• Kequshqyrja, OBSH: Preken 30-50% e pacientëve të shtruar në spitale në Evropë
• Hapet spitali ditor në QSUT, Rama thirrje mjekëve: Më shumë vëmendje ndaj pacientëve