Të dielën PS mbledh Asamblenë, cili pritet të jetë fokusi i diskutimeve

Një vit përpara zgjedhjeve parlamentare, socialistët do të rifreskojnë strukturat brenda partisë. Për këtë, kryesocialisti Edi Rama këtë të dielë ka thirrur Asamblenë Kombëtare.

Në mesazhin që sekretari i përgjithshëm, Blendi Klosi i ka dërguar anëtarëve, thuhet se në fokus është rienergjizimi i partisë në kuadër të detyrave të lëna nga Kongresi i 8 dhjetorit.

Klosi është kujdesur t’ju kujtojë anëtarëve se mungesat janë të pajustifikuara dhe se pjesëmarrja është e detyrueshme.

Brenda muajit mars duhet të përfundojë zgjedhja e kryetarëve të degëve, për t’i lënë vendin më pas delegatëve të Kongresit, Asamblesë e në fund Kryesisë së re.

Euronews Albania ka mësuar se mbledhja që do të nisë në orën 11:00 do të zhvillohet me dyer të mbyllura dhe se kjo ka qenë kërkesë e vet Ramës.

Kjo është hera e dytë pas 26 korrikut të vitit të kaluar që mbledhja e Asamblesë së kësaj force politike zhvillohet jo e hapur për mediat.

Veç zgjedhjeve brenda partisë, Rama pritet të përcjell edhe mesazhe për të vetët.

Hera e fundit kur socialistët mblodhën Asamblenë ishte në 4 shtator, ku kryeministri Rama njoftoi edhe ndryshimet në kabinetin qeveritar.

LEXONI GJITHASHTU:

• Nis punimet Kongresi i PS| Rama në krah Gramoz Ruçit, Spiropali mban fjalën hapëse
• Berisha: Kongresi i PS-së, për fshehjen e aferës së inceneratorëve