“Të na jepet statusi i vendit kandidat”, Kurti tregon në Kuvend se çfarë i kërkoi BE

Kreu i qeverisë së Kosovës Albin Kurti raportoi në Kuvend ditën e sotme se çfarë ndodhi në Bruksel një javë më parë dhe se çfarë u kërkoi krerëve të BE-së.

Ai theksoi se ka kërkuar që Serbia të sanksionohet për sulmin e 24 shtatori, në mënyrë që e njëjta gjë të mos përsëritet më.

Më tej ai theksoi se krerëve të BE-së u ka kërkuar që Kosovës t’i jepet statusi i vendit kandidat dhe që 5 shtetet e tjera ta njohin Kosovën si shtet i pavarur.

“Kam kërkuar më shumë siguri në kufirin mes Kosovës dhe Serbisë. Kërkova të bëhej sanksionimi i Serbisë për sulmin ndaj Kosovës, pasi mosndëshkimi bëhet inkurajim për përsëritje. Sulmi ka ardhur përtej kufirit. Nuk dëshirojmë që të na përsëritet një gjë e ngjashme si ajo që ndodhi më 24 shtator.

Theksova dhe progresin demokratik dhe ekonomik të Kosovës dhe kërkova që sa më parë të na jepet statusi i vendit kandidat dhe 5 shtetet mosnjohëse të njohin pavarësinë e Kosovës. Para krerëve të BE, si dëshmitarë dhe si garantues ne ofruam të nënshkruajmë marrëveshjen bazë të Brukselit megjithë aneksin zbatues të Ohrit si dhe propozimin për zbatimin e nenit 7-të të marrëveshjes në lidhje me nenin 10-të për idenë e menaxhimit të shndërruar në propozim. Nënshkrimi do të nënkuptonte pranim e zbatim”-tha ai.

LEXONI GJITHASHTU: 

• OKB: Situata në Bregun Perëndimor është alarmante
• Gjuha shqipe, gjuhë zyrtare në Zvicër? Hebibi: Ndihem si në Kosovë, s’ka paragjykime