‘Të ndahemi nga e kaluara’, deputeti Likaj: Kuvendi i 18 dhjetorit është legjitim

Deputeti i PD-së, Ramadan Likaj tha për emisionin “Mirëmëngjes” në Euronews Albania se 90% e strukturave të partisë në Malësinë e Madhe kanë marrë pjesë në Kuvendin e datës 18-dhjetor.

“Data 18 pasqyroi rrugën e Partisë Demokratike. Gjithçka tjetër është jo-legjitime. PD do të ndahet nga e kaluara”, u shpreh deputeti.

Ai nënvizoi se ajo që po ndodh brenda PD-së nuk është një situatë e lehtë, por shumë shpejt kjo parti do të bashkohet dhe ringrihet.

“Unë mendoj që PD ka një kauzë që të rrëzojnë sa më shpejt nga posti kryeministrin aktual”, u shpreh ai.

Deputeti shtoi se problemet e brendshme në PD ndikuan edhe në rezultatin zgjedhjeve të 25 prillit.

“Absolutisht nuk mund ta shkëpus këtë gjë. Se sa ka dhënë refleksin e vet këtë nuk mund ta mat sot. E vërteta është që ne jemi të vetëdijshëm që të gjithë që 25 prilli ka qenë një masakër e vërtetë”, tha ai.