‘Të pashpërblyer për faj të shtetit’, banori mbështetet nga Avokatja e Popullit

“Nuk kam marrë pagesë qiraje, na kanë diskriminuar me legalizimet”. Kështu u shpreh banori i Astirit, Ilir Katiraj, të cilit iu shemb banesa nga projekti i Unazës së Re.

Ai tregoi për emisionin “Mirëmëngjes” në Euronews Albania se procesi i legalizimit ka qenë i njëjtë, por disa fqinj të tij e morën, ndërsa ai jo.

Z. Katiraj nënvizon se është absurde që në të njëjtën zonë disa të marrin legalizimet për banesat e tyre dhe disa të tjerë jo.

Ai thotë se edhe ata banorë që i kanë pasur me dokumente banesat janë dëmshpërblyer, por me vlera të ulëta dhe kanë nisur procese gjyqsore.

Ndërsa Avokatja e Popullit, Erinda Ballanca deklaroi se këtu kemi të bëjmë me një trajtim të pabarabartë. “Shteti në këtë moment ka trajtuar në mënyrë të pabarabartë disa persona, disa përfituan nga ligji i legalizimit, disa jo”, u shpreh ajo.

Znj. Ballanca tha se për këtë çështje ka çuar raport në Kuvend. Ajo shtoi se ka një përplasje mes Avokatit të Popullit dhe institucioneve të përfshira në projektin e Unazës së Re.