“Të vrasim djalin” Si u kërcënua me armë në kokë administratori për tenderin 1 mln €

Shtetasit Algert Alcani, 27 vjeç, Edmir Boci, 37 vjeç, Shaqir Alcani, 62 vjeç, u arrestuan nga policia e Elbasanit pasi kërcënuan administratorin e një kompanie private që të tërhiqej nga një tender që kishte fituar.

Bëhet me dije se u shpall në kërkim gjithashtu dhe një 38 vjeçar, për veprën penale “Shtrëngimi me anë të kanosjes ose dhunës për dhënien e pasurisë”, e kryer në bashkëpunim.

Këta shtetas, në bashkëpunim me njëri-tjetrin, kanë shtrënguar me anë të kanosjes, shtetasin Erald Miftari, administrator i një biznesi me qendër në Cerrik, Elbasan, duke i kërkuar që të tërhiqej nga një tender 1 milionë euro i fituar në bashkinë e Tiranës, për lëndë drusore.

Burime për Euronews bëjnë me dije se të akuzuarit i kanë vendosur pistoletën në kokë administratorit për t’u tërhequr nga tenderi dhe e kane kërcënuar me jetën e djalit.

“Shtetasi E. M. nuk ka pranuar të tërhiqet dhe këta shtetas e kanë kërcënuar se do të vrisnin atë dhe familjarët e tij”, njofton policia.

Policia sekuestroi në cilësinë e provës materiale automjetin e përdorur nga autorët dhe 8 aparate celulare.

Materiale procedurale në ngarkim të tyre i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme.

LEXONI GJITHASHTU:

• Kanosën administratorin e një kompanie të tërhiqej nga tenderi, arrestohen 3 persona
• U rrahën për një gërvishje makine, e ‘pësojnë’ 4 personat e sherrit te Zogu i Zi
• Aksident në Fushë Krujë, 1 i plagosur