“Teatër kukullash”- Bledi Çuçi: Kush prish seancat plenare, do të përjashtohet

Kreu i Grupit Parlamentar të Partisë Socialiste, Bledi Çuçi, është shprehur se veprimet e deputetëve të opozitës në hyrje të Parlamentit ishin një teatër i shëmtuar.

Komentet Çuçi i bëri jasht ambienteve të Kuvendit, pas përfundimit të seancës plenare, e cila u shoqërua me tensione të shumta, teksa mbështetës të opozitës protestonin jasht ambienteve të Legjislativit.

Çuçi tha gjithashtu se nëse do të vijohet me të njëjtën situatë nga ana e opozitës, duke penguar seancat plenare, do të ketë kërkesa të tjera nga ana e mazhorancës për përjashtimin e cilitdo që pengon punimet e Kuvendit.

“Kjo ishte shfaqja dhe përdorimi më i shëmtuar që mund të bënin kolegët. Ne jemi mandatuar nga shqiptarët për të bërë jetë parlamentare normale.

Nëse ata nuk e kanë kuptuar ende dhe nëse nuk e kana marrë këtë mesazh nga shqiptarët, ne do të vijojmë me kërkesat tona për të përjashtuar këdo që prish seancat plenare apo mbledhjet e rëndësishme të Komisionit Parlamentar.

Ky teatër që merr kolegët e përjashtuar dhe i vendos para për t’i futur me zor, është një teatër as absurd jo, por teatër kukullash”, tha Çuçi.

LEXONI GJITHASHTU:

• Mblidhet grupi parlamentar i PS, Çuçi: Të enjten votojnë marrëveshjen me Italinë
• Çuçi ndan lajmin: Do të dixhitalizojmë shërbimet edhe në qeverisjen vendore