Temperaturat e larta sjellin dyndje pushuesish në bregdetin e Vlorës (VIDEO)

Temperaturat e larta që kanë përfshirë vendin këtë fundjavë kanë sjellë një fluks të madh pushuesish në bregdetin e Vlorë gjatë kësaj të shtune. Me temperatura që kanë arritur deri në 28 gradë Celsius, qindra qytetarë vendas dhe turistë të huaj kanë zgjedhur Vlorën për të kaluar ditën pranë detit, duke shënuar një nga ditët më të ngarkuara të këtij fundi maji.

Plazhet e qytetit kanë qenë të mbushura, me shezlongë të zënë që në orët e para të mëngjesit ndërkohë, trafiku në akset kryesore hyrëse dhe dalëse të qytetit është rënduar ndjeshëm, si pasojë e numrit të lartë të automjeteve që kanë mbërritur në Vlorë, duke krijuar radhë dhe ngadalësim të qarkullimit në disa segmente rrugore.

Nuk kanë munguar as grupet e ekskursioneve nga qytete të ndryshme të vendit, të cilët kanë zgjedhur Vlorën si destinacion për fundjavën, si dhe turistë të huaj që kanë preferuar bregdetin shqiptar për shkak të motit të favorshëm.

Moti i qëndrueshëm dhe temperaturat verore kanë krijuar kushte ideale për plazh, shëtitje, sporte ujore dhe aktivitete në natyrë, duke e kthyer qytetin bregdetar në një nga destinacionet më të frekuentuara të kësaj fundjave.