Tentoi të hynte në Shqipëri me 45 mijë € të padeklaruara, procedohet 43-vjeçari

Policia kufitare në Vlorë ka nisur procedimin penal ndaj një 43-vjeçari i cili tentoi të hynte në territorin e Republikës së Shqipërisë, me 45 600 euro të padeklaruara.

“Si rezultat i kontrolleve të imtësishme në hyrje/dalje të vendit, me objektiv parandalimin dhe konstatimin e paligjshmërive në kufi, shërbimet e Policisë Kufitare të Portit Vlorë, në bashkëpunim me shërbimet doganore, kanë goditur një rast të mosdeklarimit në pikën e kalimit kufitar, të një shume të konsiderueshme parash.

Për këtë rast, specialistët e Seksionit për Hetimin e Krimeve të Drejtorisë së Kufirit dhe Migracionit Vlorë referuan materialet në Prokurori ku nisi procedimi në gjendje të lirë për shtetasin K. R., 43 vjeç, pasi gjatë kontrollit në vijën e dytë, në automjetin e tij tip furgon, u gjetën 45 600 euro që ai synonte t’i fuste në territorin e Republikës së Shqipërisë, pa i deklaruar konform ligjit”, bëri e dije policia.

LEXONI GJITHASHTU:

• Vlorë/ I moshuari harroi sobën ndezur, ndërhyjnë forcat zjarrfikëse
• Krizë drejtimi në Kadastrën e Vlorës, drejtori largohet pas vetëm tre muajsh