Kryebashkiaku i Tiranës, Erion Veliaj, u arrestua këtë të hënë pas akuzave të ngritura nga Prokuroria e Posaçme Kundër Korrupsionit dhe Krimit të Organizuar për korrupsion dhe pastrim parash. SPAK në njoftimin zyrtar ka bërë me dije se, përveç Veliajt, është vendosur nën hetim edhe deputetja e Partisë Socialiste, Klotilda Bushka.

Ajo akuzohet për pengimin e hetimeve të prokurorëve të SPAK për zbardhjen e skemës korruptive të lidhur me kryebashkiakun.

Në një njoftim zyrtar, SPAK njofton se Klotilda Bushka është regjistruar si person i dyshuar për veprën penale të “Veprime që pengojnë zbulimin e së vërtetës”, sipas nenit 301 të Kodit Penal. Hetimet kanë të dhëna konkrete që sugjerojnë se ajo ka ndërhyrë në mënyrë aktive për të penguar procesin hetimor lidhur me procedimin penal nr. 27 të vitit 2024.

“Përveç sa është përmendur mësipër, Prokuroria e Posaçme po kryen hetime paraprake ndaj deputetes së Kuvendit të Shqipërisë, shtetases K. B. Emri i kësaj të fundit është regjistruar në regjistrin përkatës të njoftimeve si person i dyshuar për kryerjen e veprës penale të “Veprime që pengojnë zbulimin e së vërtetës”, parashikuar nga neni 301 i Kodit Penal. Deri në këtë fazë konstatohet se ekzistojnë të dhëna konkrete të cilat të çojnë tek dyshimi i arsyeshëm se personi nën hetim K. B. ka kryer veprime aktive të kundërligjshme të cilat kanë interferuar me hetimin e organit procedues në lidhje me procedimin penal nr. 27 të vitit 2024”, njofton SPAK.

LEXONI GJITHASHTU:

• Nga shoqëria civile në politikë, karriera e Erion Veliajt që nga viti 2003 
• Pse Veliaj u dërgua te Blloku i Sigurisë dhe jo në polici? Avokati ndan detaje