Tentoi të vriste nënë e bir duke i përplasur me automjet, arrestohet 38-vjeçari

Një 38-vjeçar ka rënë në prangat e policisë së Vaut të Dejës pasi tentoi të vriste 2 shtetas nënë e bir, për motive të dobëta, duke i përplasur me makinë.

38-vjeçari i përplasi qëllimisht me makinë 32-vjeçarin dhe nënën e tij 60-vjeçare teksa këta të fundit po ecnin në korsin e dedikuar për këmbësorët.

Policia bën me dije se ka sekuestruar në cilësinë e provës material automjetin që drejtonte 38-vjeçari.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.

“Shërbimet e Komisariatit të Policisë Vau i Dejës, menjëherë pas marrjes së njoftimit se një shtetas kishte përplasur me automjetin që drejtonte, 2 shtetas që po kalonin në korsinë e dedikuar për këmbësorë, kanë nisur menjëherë veprimet hetimore për zbardhjen e rrethanave të rastit, identifikimin dhe kapjen e drejtuesit të automjetit.

Në përfundim të veprimeve të kryera në bashkëpunim me Seksionin për Hetimin e Krimeve ndaj Personit të DVP Shkodër, u arrestua në flagrancë shtetasi:

M. M., 38 vjeç, banues në fshatin Kosmaç, për veprën penale “Vrasja me dashje”, mbetur në tentativë.

Ky shtetas, më datë 15.03.2024, në Bushat, dyshohet se për motive të dobëta, ka tentuar të vrasë, duke i përplasur me automjetin që drejtonte, në korsinë e dedikuar për këmbësorë, 2 kolegët e tij, shtetasit D. N., 60 vjeçe dhe K. N., 32 vjeç (nënë e bir), të cilët janë jashtë rrezikut për jetën.

Automjeti që drejtonte shtetasi M. M. është sekuestruar në cilësinë e provës materiale.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme”, thuhet në njoftimin e policisë.

LEXONI GJITHASHTU: 

• Sekuestrohen armë zjarri në makinën e Emilijano Nikës, kushëriri i Ervis Martinajt
• A duhet të votojnë emigrantët, a e njohin Shqipërinë? Çfarë mendimi kanë qytetarët