Tentoi të vriste prindërit e moshuar duke djegur banesën, arrestohet 42-vjeçari

Një 42-vjeçar në Fier është arrestuar pasi ka tentuar të vrasë prindërit e tij të moshuar.

Sipas informacioneve të ardhura nga policia ai i ka vënë flakën banesës ku jetonte së bashku me prindërit, ka mbyllur dyert që ata të mos dilnin dhe është larguar.

Ka qenë ndërhyrja e zjarrfikëses e cila ka bërë të mundur shuarjen e flakëve dhe shpëtimin e dy të moshuarve të cilët për fat të mirë janë në gjendje të mirë shëndetësore.

Dyshohet se ky shtetas ka ushtruar më parë dhunë ndaj prindërve të tij.

Njoftimi i policisë:

Mbrëmjen e djeshme, në lagjen “15 Tetori”, Fier, një banesë ku ndodheshin 2 të moshuar, është përfshirë nga flakët.

Pas marrjes së njoftimit, kanë shkuar menjëherë në vendngjarje shërbimet e Policisë dhe të Zjarrfikëses, të cilët kanë mundur të nxjerrin nga banesa, 2 të moshuarit, në gjendje të mirë shëndetësore. Zjarrfikësit kanë bërë të mundur fikjen e zjarrit.

Nga hetimet paraprake rezultoi se djali i shtetasve të moshuar, shtetasi A. S., 42 vjeç, banues në Fier, i ka vënë zjarrin banesës ku jetonte bashkë me prindërit, ka mbyllur dyert, në mënyrë që ata të mos dilnin nga banesa dhe është larguar.

Po nga veprimet hetimore dyshohet se ky shtetas ka ushtruar më parë dhunë ndaj prindërve të tij.

Shërbimet e Komisariatit të Policisë Fier bënë të mundur kapjen dhe arrestimin e shtetasit A. S., 42 vjeç.

Materialet procedurale do t’i kalojnë Prokurorisë, për veprime të mëtejshme, për veprat penale “Vrasja për shkak të marrëdhënieve familjare”, mbetur në tentativë, “Dhuna në familje” dhe “Shkatërrimi i pronës me zjarr”.

LEXONI GJITHASHTU:

• Protesta te Kuvendi/ Ministri Hoxha mohon akuzat: Efektivët nuk kishin armë zjarri
• Vetëplagoset me armë zjarri 28-vjeçari në Shkodër