Kosova ka akuzuar Serbinë se qëndron pas një grupi paraushtarak që zuri në pritë një patrull policie dhe u përlesh me forcat kosovare të dielën, shkruan thë Guardian.

Në një intervistë të dhënë për median britanike ministri i Brendshëm të Kosovës, Xhelal Sveçla, akuzoi Serbinë si financuesin dhe ideuesin e këtij sulmi për të destabilizuar Kosovën.

“Ky grup ka ardhur nga Serbia, ata janë të trajnuar në Serbi, të financuar dhe pajisur nga ushtria e Serbisë dhe policia e saj”, tha për Guardian Xhelal Sveçla.

“Një pjesë e armëve janë marrë nga magazinat e ushtrisë dhe janë dorëzuar te terroristët që kanë ardhur në Kosovë nga Serbia”, shtoi ai.

Sveçla tha se ministria e tij kishte ndarë provat me ambasadat dhe agjencitë perëndimore.

“Ajo që ata donin të bënin ishte të kapnin territorin e Kosovës dhe të hapnin një kanal të ri komunikimi, një rrugë të re nga Serbia në Kosovë”, tha ai, duke shtuar se qëllimi përfundimtar ishte ndarja e vendit.

Qeveria serbe ka mohuar përfshirjen me grupin e armatosur, por ka mbajtur një ditë zyrtare zie për tre të vdekurit.

Vuçiç ka kërkuar të justifikojë veprimet e tyre duke ngritur pretendime të rreme, në një takim me ambasadorin rus në Beograd, se qeveria e Kosovës po kryente spastrim etnik, shkruan The Guardian.

Kosova pretendon se grupi drejtohej nga Milan Radoiçiç, nënkryetari i partisë Lista Serbe e mbështetur nga Beogradi, e cila dominon politikën në katër komunat me shumicë serbe në veri të Kosovës.

Sveçla tha se shërbimi i inteligjencës së vendit të tij besonte se Radoiçiç, i cili është sanksionuar nga SHBA dhe Britania e Madhe, ishte plagosur dhe po shërohej në spitalin kryesor ushtarak në Beograd.

Pretendimi nuk mund të verifikohej në mënyrë të pavarur. Radoiçiç nuk ka bërë një deklaratë publike, por ministri i Jashtëm i Serbisë, Ivica Daçiç, pretendoi se një video që tregonte Radoiçiçin në mesin e paraushtarakëve ishte një “mashtrim”.

“Përplasja ndodhi në një kohë kur bisedimet e ndërmjetësuara nga BE-ja që synojnë normalizimin e marrëdhënieve midis dy vendeve janë ngecur, me Vuçiçin që u zotua se nuk do ta njohë kurrë Kosovën, dhe qeveria e Kosovës si pasojë refuzon të krijojë një asociacion gjysmë autonom të komunave serbe.

SHBA-të i kanë mbështetur bisedimet dhe deri më tani kanë mbajtur anën e Evropës se fajin më të madh për dështimin e bisedimeve e ka kryeministri, Albin Kurti. Por administrata Biden po heton përfshirjen e Beogradit në njësinë paraushtarake dhe po përpiqet të zbulojë misionin e saj.

Nëse Vuçiç zbulohet se ka qenë i përfshirë, kjo mund të ndryshojë qasjen e ndërmarrë nga SHBA dhe BE ndaj negociatave, të cilat janë kritikuar nga ligjvënësit në të dy anët e Atlantikut si të njëanshme ndaj Beogradit. Kjo gjithashtu mund të çojë në sanksione ndaj Serbisë”, përfundon artikulli i The Guardian.

LEXONI GJITHASHTU:

• Vuçiç mbron terroristët: Radoiçiç është një luftëtar për liri
• Rama: Qëndrimi i Shqipërisë i qartë, BE të dënojë me zë të lartë vrasjen e policit
• Rama: Dialogu Kosovë-Serbi të ngrihet në nivelin e një konference ndërkombëtare