Theu “arrestin e shtëpisë” dhe plagosi 27-vjeçarin në Velipojë, identifikohet autori

Është identifikuar dhe shpallur në kërkim autori i plagosjes së 27-vjeçarit në Velipojë në datën 02.04.2024.

Përmes një njoftimi, Policia bën të ditur se autori është një 25-vjeçar, i cili rezulton se kishte thyer masën e sigurisë “arrest shtëpie” në momentin që ndërmori aktin.

I plagosuri vijon të jetë nën kujdesin e mjekëve, ndërkohë që vijon punë për zbardhjen e plotë të ngjarjes.

Njoftimi i Policisë:

Shkodër/Vijojnë veprimet hetimore për zbardhjen e rrethanave të plagosjes së ndodhur mbrëmjen e datës 02.04.2024, në Velipojë.

Identifikohet dhe shpallet në kërkim një 25-vjeçar, autor i dyshuar i plagosjes me armë zjarri.

Si rezultat i veprimeve hetimore të kryera nga specialistët e Seksionit për Hetimin e Krimeve ndaj Personit të DVP Shkodër, për zbardhjen e rrethanave të plagosjes së ndodhur mbrëmjen e datës 02.04.2024, në fshatin Malikolaj, Velipojë, bazuar dhe në informacionet e siguruara nga inteligjenca policore, është identifikuar autori i dyshuar i këtij rasti, shtetasi K. L., 25 vjeç, banues në fshatin Baks i Ri, Velipojë.

Nga verifikimet e kryera ka rezultuar se shtetasi K. L. kishte thyer masën e sigurisë “Arrest në shtëpi”, të caktuar nga Gjykata, për veprën penale “Vjedhja e kryer duke shpërdoruar detyrën”.  Vijon puna për lokalizimin dhe kapjen e këtij shtetasi.

I plagosuri, shtetasi E. P., 27 vjeç, vijon të jetë në kujdesin e mjekëve.

Në drejtimin e Prokurorisë vijon puna hetimore për zbardhjen e rrethanave të këtij rasti.

Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.

LEXONI GJITHASHTU:

• Sherr me thika dhe shkopinj druri mes adoleshentëve në Elbasan, një i plagosur
• Shpëtohet 17 vjeçari nga mbytja  në plazhin e Velipojës