“T’i ndërpritet mandati”- Debate në KQZ për kryebashkiakun e Kuçovës

Në Komisionin Qëndror të Zgjedhjeve po mbahet seanca ku do të vendoset mbi fatin e kryebashkiakut të zgjedhur të Kuçovës, Kreshnik Hajdari, i cili sipas prokurorisë ka fshehur në formularin e dekriminalizimit një dënim të marrë në shtetin grek.

KQZ pritet të vendosë nëse Hajdari do të vijojë mandatin, apo do ta ndërpresë atë.

Krahas përfaqësuesit ligjor të kryebashkiakut, në seancë janë të pranishëm dhe përfaqësuesit ligjor të koalicionit Bashkë Fitojmë si dhe ish-kandidati Lefter Maliqi.

Perfaqësuesi ligjor i Kreshnik Hajdarit, dekraoi se klienti i tij nuk e ka thyer ligjin e dekriminalizimit.

Nuk takon asnjë nga rastet ndaluese të ligjit të dekriminalizmit, nuk ka asnjë shkak për atë që pretendohet nga iniciuesit në procedurë” “, tha avokati i tij Theodhori Sollaku.

Altin Kaziaj, përfaqësues ligjor i koalicionit “Bashke Fitojmë” kërkoi ndalim të menjëhershëm të funksionit të kryebashkiakut të zgjedhur.

“Të ndalohet ushtrimi i funksionit publik për shkak të mos deklarimit në formularin e dekriminalizmit”, tha ai.

Të njëjtën kërkesë artikuloi dhe përfaqësuesi tjetër i koalicionit “Bashkë Fitojmë”, Franc Nuri.

“I qëndrojmë mendimit se mandati duhet ndërprerë menjëherë. Nuk e ka deklaruar në formularin e dekriminalizimit”, tha ai.

Ka qenë komisioni qendror i zgjedhjeve ai i cili është drejtuar prokurorisë së përgjithshme me një shkresë ku kërkonte verifikimin e pastërtisë së figurës së Hajdarit, i cili u zgjodh në 14 maj si kryebashkiak i Kuçovës.

Prokuroria e përgjithshme pas marrjes së kërkesës është vënë në lëvizje dhe i është drejtuar me letër porosi drejtësisë greke. Ai rezulton i dënuar nga drejtësia greke, por këtë fakt nuk e ka deklaruar në formularin e vetë deklarimit.

LEXONI GJITHASHTU:

• Drejt shkarkimit? Prokuroria: Kryebashkiaku i Kuçovës rezulton i dënuar
• KQZ nuk shkarkoi kryebashkiakun e Kuçovës, Maliqi: Turp, jeni bandita të shtetit