Tirana kap të kërkuarin në Britani, pjesë e grupit që trafikonte drogë në Berat

Në kuadër të operacionit ndërkombëtar të koduar “The Wanted”, Interpol Tirana, në bashkëpunim të ngushtë me partnerët ndërkombëtarë, ka bërë të mundur lokalizimin dhe arrestimin në Mbretërinë e Bashkuar të një shtetasi shqiptar të shpallur në kërkim ndërkombëtar.

I arrestuari, Xhuliano Hoxha, 30 vjeç, kërkohej nga autoritetet shqiptare pas një vendimi të Gjykatës së Posaçme kundër Korrupsionit dhe Krimit të Organizuar, GJKKO, e cila më 22 prill 2025 i caktoi masën e sigurisë “arrest në burg” për akuzat:

1. “Kultivimi i bimëve narkotike”,
2. “Grupi i strukturuar kriminal”,
3. dhe “Kryerja e veprave penale nga grupi i strukturuar kriminal dhe organizata kriminale”.

Sipas njoftimit të policisë, ky person është pjesë e një grupi kriminal që vepronte në fushën e narkotikëve dhe u godit gjatë megaoperacionit “Stuhia”, zhvilluar në nëntor të vitit 2022 në fshatin Drenovicë, Berat, ku u sekuestruan 870 kilogramë lëndë narkotike Cannabis Sativa.

Arrestimi i 30-vjeçarit u realizua falë bashkëpunimit mes Interpol Tiranës dhe Interpol Mançesterit, ndërsa po vijojnë procedurat për ekstradimin e tij drejt Shqipërisë.

LEXONI GJITHASHTU:

• Turqia dhe Mbretëria e Bashkuar nënshkruajnë memorandum për avionët luftarakë
• Takimi sekret në Athinë, Karamuço zbulon marrëveshjen për ekstradimet nga Dubai