Tiranë/ Po transportonin kanabis në një automjet, vihen në pranga 2 persona

Policia e Tiranës ka arrestuar Enea Tahirin 37 vjeç dhe Besnik Shabanin 48 vjeç, të cilët u kapën duke transportuar lëndë narkotike në një automjet.

Burime nga policia kanë konfirmuar se Tahiri dhe Shabani kishin vetëm rolin e transportuesve të lëndës narkotike, ndërsa porositësit janë persona të tjerë. Sipas hetimeve, kanabisi do të vinte fillimisht në Tiranë dhe më pas do të transportohej drejt Greqisë nga dy të arrestuarit.

Plani i tyre parashikonte që të mos përdornin të njëjtin mjet për transportin final, në mënyrë që të humbnin gjurmët dhe të shmangnin rënien në sy të policisë.

Operacioni u realizua pas informacionit të siguruar nga inteligjenca policore, ku shërbimet e Policisë kanë ndaluar një automjet në aksin rrugor “Mamurras-Kashar” në Thumanë. Gjatë kontrollit në automjetin që drejtohej nga 37 vjeçari dhe kishte pasagjer Besnik Shabani, Policia ka gjetur 59 pako me lëndë narkotike të dyshuar si kanabis me një peshë totale prej 60 kilogramë e 6 gramë.

Si rezultat i operacionit, janë sekuestruar edhe pakot me lëndë narkotike dhe automjeti që dyshohet të jetë përdorur për transportimin e saj.

Policia ka nisur hetimet për të zbardhur plotësisht këtë aktivitet kriminal dhe mundësinë e identifikimit të personave të tjerë të përfshirë.

Materialet procedurale iu referuan Prokurorisë së Tiranës, për veprime të mëtejshme.

LEXONI GJITHASHTU:

• Detaje të reja nga atentati në Durrës, viktima me precedent penal
• I dënuar për trafikim të qënieve njerëzore, sekuestrohen pasuritë e 34-vjeçarit