Tragjedi në ujërat greke, fundoset gomonia me emigrantë, 3 fëmijë humbin jetën

Një ngjarje e rëndë ka ndodhur në ujërat greke, ku një gomone që transportonte emigrantë të paligjshëm është fundosur.

Sipas mediave të huaja, si pasojë e incidentit kanë humbur jetën tre vajza të mitura 4, 7 dhe 10 vjeç.

Ka qenë nëna e tyre e cila ka konfirmuar lajmin, ndërkohë që mësohet se janë shpëtuar 16 persona, mes tyre 8 fëmijë, më i vogli prej të cilëve është vetëm 30 ditësh.

Operacioni i shpëtimit filloi kur tre emigrantë u gjendën në qytetin e Kios këtë mëngjes dhe informuan autoritetet për njerëzit e mbetur të bllokuar në bregun shkëmbor të Kardamylos, Kios.

Në vendngjarje tentuan të mbërrijnë forcat e Autoritetit Portual të Kios dhe të Stacionit Portual të Kardamylos, ndërsa kërkimi u krye edhe nga deti me tre skaf dhe një helikopter të Rojës Bregdetare.

Sipas të mbijetuarve, veç viktimave, asnjë person tjetër nuk mungon.

LEXONI GJITHASHTU:

• Tragjedi në jug të Sirisë, 7 fëmijë humbën jetën në një shpërthim
• “Vajza bleu biletë vdekjeje”- Nëna e Klaudias pas tragjedisë: Më dhanë hirin e saj