Trajneri Sylvinho vijon turin e takimeve me lojtarët e kombëtares shqiptare

Trajneri i kombëtares shqiptare, Sylvinho, vijon takimet e tij me futbollistët, dhe i fundit që ka takuar është mbrojtësi Ardian Ismajli. Braziliani po i vëzhgon nga afër të gjithë futbollistët, ndërsa nuk përjashtohen mundësitë për prurje të reja në skuadër.

Që prej emërimit në krye të kombëtares shqiptare, trajneri Sylvinho ka realizuar takime të vazhdueshme me lojtarët gjatë periudhës kur ata janë të angazhuar me skuadrat e tyre. Braziliani ka vijuar këtë praktikë edhe në prag të kualifikuesve për Kupën e Botës, duke biseduar nga afër me mbrojtësin Ardian Ismajli, i cili është shoqëruar nga Doriva dhe Zabaleta. Takimi kishte si qëllim vlerësimin e gjendjes shëndetësore të futbollistit të Empolit, i cili vazhdon të jetë i dëmtuar, por nuk është i vetmi lojtar i lënduar.

Gjithashtu, gjatë kësaj periudhe, trajneri i kuqezinjve ka zhvilluar takime me kapitenin Gjimshiti, si dhe me Mehmetin në Angli më herët. Sylvinho dhe ndihmësit e tij kanë ndjekur nga afër edhe ndeshjen Fiorentina-Inter, ku aktivizohet mesfushori Kristjan Asllani.

Situata aktuale te kombëtarja shqiptare nuk është shumë pozitive, pasi disa futbollistë janë të dëmtuar. Krahas Ismajlit, në mbrojtje nuk janë gati as Hysaj dhe Mitaj. Sipas informacioneve, stafi i kombëtares ka ndjekur dhe futbollistë të tjerë shqiptarë, të cilët mund të ftohen për grumbullim në prag të kualifikueseve të Botërorit. Ndeshja e parë për Shqipërinë është kundër Anglisë, ndërsa më pas do të luhet ndaj Andorrës, më 21 dhe 24 mars, e para në transfertë dhe e dyta në arenën kombëtare.

LEXONI GJITHASHTU:

• Shqipëria humbet ndaj Çekisë, Silvinjo: Ishin të motivuar, sidomos pas humbjes 3-0
• Rikthehet Muçi dhe mungon Manaj, Silvinjo shpjegon zgjedhjet e lojtarëve