Tre politikanë nga Mali i Zi shpallen “persona të padëshiruar” nga Kroacia

Kryetari i parlamentit malazes Andrija Mandiç, deputeti Millan Knezheviç dhe zëvendëskryeministri Aleksa Beçiç janë shpallur persona të padëshirueshëm  në Zagreb, për këtë Ministria e Punëve të Jashtme dhe Evropiane e Kroacisë ka njoftuar sot Malin e Zi përmes një note drejtuar Ambasadës së Malit të Zi në Zagreb.

Zagrebi tha se ky vendim u mor për shkak se këta politikanë kanë kryer veprime të vazhdueshme për prishjen e marrëdhënieve të fqinjësisë së mirë dhe për shkak të, “ abuzimit të Kroacisë për qëllime të brendshme politike”.

“Ministria e Punëve të Jashtme shpreh keqardhjen që shumica në Parlamentin e Malit të Zi vendosi të shpërfillë thirrjet e vazhdueshme të Republikës së Kroacisë për të mos ndërmarrë lëvizje që mund të ndikojnë negativisht në marrëdhëniet tona dypalëshe dhe në rrugën evropiane të Malit të Zi.

Në këtë kontekst, vihen në pah veprimet e zyrtarëve politikë të përmendur, të cilët nuk mund të konsiderohen dashamirës dhe fqinjësorë në raport me Republikën e Kroacisë dhe as nuk janë në përputhje me qëllimin e deklaruar për anëtarësim të Malit të Zi në Bashkimin Evropian”, u tha në njoftim.

Sipas Ministrisë kroate, fqinjësia e mirë është një ndër elementët kyçë të procesit të zgjerimit dhe atij të stabilizim asociimit “dhe një nga kriteret kryesore për vlerësimin e përparimit në procesin e anëtarësimit të Malit të Zi” në Bashkimin Evropian.

LEXONI GJITHASHTU:

• Nisin miqësoret në prag të Euro 2024: Në fushë zbresin Gjermania, Kroacia dhe Anglia
• “Vlora ka filluar të reflektojë”, gazetari: Janë ulur çmimet e çadrave në Livadh