Trump ndalon financimin e opsionit të të rinjve LGBTQ për parandalimin e vetëvrasjes

Një pjesë e një linje telefonike kombëtare amerikane për parandalimin e vetëvrasjeve që kujdeset për të rinjtë LGBTQ thotë se së shpejti do të mbyllet, pasi administrata Trump i uli fondet.

Administrata e ka akuzuar shërbimin për “ideologji radikale gjinore”.

Ai thotë se do të vazhdojë të financojë Linjën më të gjerë të Ndihmës për Vetëvrasje dhe Kriza 988 – pjesë e së cilës është edhe opsioni i të rinjve LGBTQ – dhe se të gjithë telefonuesit do të marrin “dhembshuri dhe ndihmë”.

Projekti Trevor, një organizatë që ndihmoi në drejtimin e opsionit LGBTQ, tha se vendimi do të kishte një ndikim të dëmshëm tek të rinjtë e cenueshëm.

“Parandalimi i vetëvrasjeve ka të bëjë me njerëzit, jo me politikën”, tha Jaymes Black, drejtori ekzekutiv i organizatës. Ai tha se shërbimit të tij i ishte thënë të mbyllej brenda 30 ditësh.

“Vendimi i administratës për të hequr një shërbim dypartiak, të bazuar në prova, i cili ka mbështetur në mënyrë efektive një grup të rinjsh me rrezik të lartë gjatë momenteve të tyre më të errëta, është i pakuptueshëm”, shtoi zoti Black.

Vendimi vjen gjatë Muajit Ndërkombëtar të Krenarisë, i cili feston kulturën dhe historinë LGBTQ.

Lajmi erdhi gjithashtu përpara një vendimi të Gjykatës Supreme të SHBA-së të martën, i cili mbështeti ndalimin e shtetit të Tenesit për kujdesin shëndetësor të lidhur me tranzicionin për të miturit që identifikohen si transgjinorë.

Aktualisht, të rinjtë LGBTQ mund të zgjedhin opsionin 3 nga një meny thirrjesh për t’u lidhur me këshilltarët.

Pas ndryshimeve, shërbimet e mbetura të 988 Lifeline do të “përqendrohen në shërbimin e të gjithë kërkuesve të ndihmës”, përfshirë ata që më parë zgjodhën të aksesonin shërbimet për të rinjtë LGBTQ, tha SAMHSA.

Por linja telefonike “nuk do të izolojë më shërbimet për të rinjtë LGB+”, shkroi SAMHSA në një deklaratë, duke hequr “T” dhe “Q” që i referohen personave transgjinorë dhe queer në akronimin LGBTQ.

LEXONI GJITHASHTU:

• “Ekipe të sofistikuara kineze janë në Iran”, Demiraj: Si u thye mbrojtja e Izraelit
• 34-vjetori i PS, Rama: Shqetësohuni ditën kur do mungojë Gramozi në këtë oborr