Trump: Po përpiqemi të rimarrim bazën ajrore në Afganistan nga talibanët

Presidenti amerikan Donald Trump ka deklaruar se Shtetet e Bashkuara janë duke u përpjekur të rimarrin bazën ajrore Bagram në Afganistan, e cila ndodhet aktualisht nën kontrollin e talibanëve. Kjo deklaratë u bë gjatë një konference të përbashkët për shtyp në Londër me kryeministrin britanik, Keir Starmer.

“Ne po përpiqemi ta marrim përsëri, dhe ky mund të jetë lajm i ri,” tha Trump të enjten mbrëma, duke theksuar se udhëheqësit talibanë “kanë nevojë për gjëra nga ne,” megjithatë pa dhënë detaje konkrete mbi procesin apo negociatat e mundshme.

Sipas Trump, një ndër arsyet kryesore për rikthimin e kontrollit mbi bazën është pozicioni strategjik i saj. “Siç e dini, është një orë larg nga vendi ku Kina prodhon armët e saj bërthamore. Pra, shumë gjëra po ndodhin,” tha ai, duke nënvizuar rëndësinë gjeopolitike të Bagramit në kontekstin e rivalitetit SHBA-Kinë.

Trump kishte shprehur më herët keqardhje për humbjen e kësaj baze, që ndodhet rreth 40 kilometra nga kryeqyteti Kabul. Në maj, ai kishte deklaruar se baza ishte “e pushtuar” nga Kina, duke e cilësuar largimin nga Bagram si një gabim strategjik.

Baza ajrore Bagram ishte një nga pikat më të rëndësishme ushtarake të SHBA-së në Afganistan për gati dy dekada, deri në tërheqjen e forcave amerikane në vitin 2021.

LEXONI GJITHASHTU:

• Institucionet shëndetësore e arsimore serbe, Kurti: Do t’i bashkojmë në një sistem
• Kim Jong Un shpall si prioritet zhvillimin e dronëve me inteligjencë artificiale