Tushemishti nuk zgjidhet nga turistët, fshati turistik përjeton sezon i vështirë

Në kulmin e sezonit veror, Tushemishti një nga fshatrat më piktoreskë dhe më të frekuentuar të Pogradecit po përballet me një rënie të ndjeshme të numrit të vizitorëve.

Operatorët turistikë të zonës, përfshirë hotelet, restorantet dhe bizneset e tjera të lidhura me turizmin, shprehin shqetësimin e tyre, duke theksuar se këtë verë fluksi i pushuesve ka rënë ndjeshëm krahasuar me vitet e kaluara.

Sipas tyre, shkaku kryesor i kësaj situate lidhet me punimet që po zhvillohen në zonën e Drilonit dhe përgjatë rrugës hyrëse për në Tushemisht, të cilat kanë krijuar vështirësi në qarkullim dhe kanë penguar ardhjen e turistëve.

Tushemishti, i njohur për bukuritë natyrore dhe historinë e pasur ku veçohet figura ikonike e Teto Ollgës po përjeton një sezon të vështirë ekonomikisht.

Ndërkohë, një pamje ndryshe paraqitet në qytetin e Pogradecit, ku kapacitetet hoteliere janë thuajse të gjitha të rezervuara dhe qyteti po përjeton një rritje të dukshme të numrit të turistëve.

LEXO GJIITHASHTU: 

• VIDEO/Sherr Tushemisht, biznesmeni dhe kryeplaku konfliktohen fizikisht

• Borshi, destinacioni i preferuar për pushime! Qytetarët dhe bizneset ndajnë përvojat