U ekstradua nga Dubai, GJKKO lë në “Arrest me burg” Florenc Çapjan

Gjykata e Posaçme Kundër Korrupsionit dhe Krimit të Organizuar (GJKKO) ka konfirmuar masën e sigurisë “arrest në burg” për Florenc Çapjen, i ekstraduar nga Dubai tre ditë më parë. Çapja përballet me akuzën e “sigurimit të kushteve për vrasje” ndaj Sokol Sanxhaktarit, dhëndrit të ish-kryebashkiakut të ndjerë të Elbasanit, Qazim Sejdini, një krim që mbeti në tentativë.

Në sallën e gjyqit, Çapja e ka mohuar plotësisht akuzën, teksa u shpreh se akuzat janë të pabazuara dhe se nuk ka përdorur komunikimin e koduar Sky ECC. Përmes avokatit të tij, ai tha se çështja mbështetet vetëm në deklarimet e Nuredin Dumanit dhe Henrik Hoxhajt, të dhëna gjatë hetimeve. Sipas mbrojtjes, Dumani ka mohuar në gjykatë të ketë dhënë dëshmi për sigurim kushtesh nga ana e Çapjes.

I dënuar më parë me burgim të përjetshëm për vrasjen e Nezir dhe Gentian Beqirit, Florenc Çapja ka mohuar dhe këtë çështje, duke akuzuar organet e drejtësisë për mungesë hetimesh të reja. “Dosja është vetëm me deklarimet e Ervis Bardhit. Pse nuk janë bërë hetime të tjera?” tha ai para trupit gjykues.

Ai kundërshtoi gjithashtu versionin e ekstradimit, duke pretenduar se nuk ishte detyruar të rikthehej në Shqipëri. “Kam qëndruar tri orë në zonën neutrale në Stamboll. Po të doja, nuk vija fare,” u shpreh Çapja.

LEXONI GJITHASHTU:

• Shijak, kapet 32-vjeçari i dënuar me 10 vjet burg për dhunë seksuale ndaj të miturve
• Emrat/ Aksident në Shkodër, shoferja humb kontrollin e mjetit dhe përplas këmbësorin