U paraqitën si italianë, arrestohen tre shtetas nga Sri Lanka në Qafë Thanë

Tre shtetas nga Sri Lanka janë arrestuar në flagrancë nga Policia Kufitare në pikën e kalimit kufitar të Qafë Thanës, pasi tentuan të kalonin kufirin me dokumente të falsifikuara.

Sipas njoftimit zyrtar të policisë, gjatë kontrollit të ushtruar ndaj tyre, është konstatuar se secili posedonte një leje qëndrimi në Itali, e cila dyshohet se është e falsifikuar.

Pas verifikimeve, u bë arrestimi në flagrancë i shtetasve N. L., 57 vjeç, A. K., 51 vjeç, dhe K. W., 36 vjeç, të gjithë me banim në Sri Lanka. Ata akuzohen për veprën penale “Falsifikimi i letërnjoftimeve, i pasaportave ose i vizave”.

Ndërkohë, në një rast të veçuar, strukturat e Drejtorisë Vendore për Kufirin dhe Migracionin Korçë referuan materialet në Prokurori për shtetasin M. B., 37 vjeç, banues në fshatin Grabovicë, Pogradec. Ai u kap nga shërbimet e Policisë Kufitare në fshatin Goricë, duke tentuar të kalonte ilegalisht kufirin shtetëror. Për të është nisur procedim penal për veprën “Kalimi i paligjshëm i kufirit shtetëror”.

Materialet procedurale për të dy rastet janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme hetimore.

LEXONI GJITHASHTU:

• Aksident në Korçë: Makina përplaset me motorin, një i plagosur
• Aksident në Moravë/ Përmbyset Benzi, drejtuesi del pa lëndime