U zhduk në mënyrë misterioze, gjendet i mbytur në det 49-vjeçari në Ksamil

Pas dy ditësh kërkimesh intensive, policia ka gjetur trupin e pajetë të 49-vjeçarit Naim Likometi në plazhin e Gjirit të Hartës, duke i dhënë fund misterit të zhdukjes së tij.

Sipas burimeve policore, trupi u zbulua në orët e pasdites dhe u transportua menjëherë drejt morgut për autopsi, me qëllim përcaktimin e shkakut të saktë të vdekjes. Paraprakisht, dyshohet se 49-vjeçari është mbytur në det, por autoritetet nuk përjashtojnë asnjë pistë hetimi.

Likometi, banor i Tiranës, ishte shpallur i zhdukur që nga mëngjesi i 8 marsit. Misteri rreth fatit të tij u thellua më tej kur rrobat dhe telefoni i tij u gjetën në breg të detit. Sipas familjarëve, celulari i tij ka qenë aktiv deri në orën 16:00 të së njëjtës ditë, përpara se të fiket, duke e bërë edhe më të vështirë lokalizimin e tij.

Hetimet vazhdojnë për të zbardhur rrethanat e plota të kësaj ngjarjeje tragjike.

Njoftimi i policisë

Rreth orës 14:00, në vendin e quajtur “Gjiri i Hartës”, është gjetur i pajetë shtetasi N. L., 50 vjeç, banues në Tiranë, i cili paraprakisht dyshohet se është vetëmbytur.

Trupi i këtij shtetasi u gjet si rezultat i kërkimeve të pandërprera të kryera nga shërbimet e Komisariatit të Policisë Sarandë, në bashkëpunim me shërbimet e Policisë Kufitare Sarandë, pas kallëzimit të bërë dje nga bashkëshortja e 50-vjeçarit, për humbjen e kontakteve me të.

Grupi hetimor po punon për sqarimin e rrethanave të rastit.

LEXONI GJITHASHTU:

• Zhduket në mënyrë misterioze 49-vjeçari në Ksamil, rrobat i gjenden në breg të detit
• Zhduket pa gjurmë 36-vjeçarja në Korçë, detajet e para
• Zhduket pa gjurmë 54-vjeçari në Korçë, flet i vëllai