Zhduket pa gjurmë 54-vjeçari në Korçë, flet i vëllai

Prej ditës së dielë, 54-vjeçari Valmir Lame nga fshati Kamenicë i Korçës ka humbur kontaktet me familjarët, duke ngritur shqetësim mes tyre dhe banorëve të zonës.

Pavarësisht kërkimeve të vazhdueshme, ende nuk ka asnjë gjurmë të tij. Familjarët kanë kërkuar ndihmën e polumbarëve të forcave RENEA, pasi dyshohet se mund të jetë vetëvrarë në rezervuarin e fshatit, i cili ndodhet pranë stanit të bagëtive të familjes së tij.

Vëllai i tij, Dashnor Lame, ka deklaruar se Valmiri kishte prej kohësh probleme të shëndetit mendor, por nuk ishte larguar më parë nga banesa dhe merrej me blegtori.

“Ka humbur që të dielën, e kemi kërkuar në çdo vend. Kemi kërkuar ndihmën e policisë dhe pastaj të polumbarëve. Policia bëri ekspertizën këtu në rezervuar, do bëhet më pas procesverbali që ti jepet Drejtorisë së Policisë e të shikojmë se çfarë do bëjmë. Afër rezervuarit kemi bagëtitë që i mbajmë aty. Nuk kishim punë të rëndë që dhe vëllai të largohej nga fshati. Ai ishte i sëmur kohët e fundit. Kishte 2-3 muaj me dhimbje koke sepse ka pasur probleme shëndetësore që i vogël dhe ka vajtur shumë herë në spital. I kanë bërë vizita dhe i kanë thënë të paraqitej më datë 5 shkurt. Kjo është hera e parë që na ndodh kështu, nuk ishte larguar më parë”, tha i vëllai i Valmir Lames.

Ndërkohë, forcat polumbare kanë mbërritur në rezervuarin e Kamenicës dhe po kërkojnë për gjetjen e trupit të 54-vjeçarit.

LEXONI GJITHASHTU:

• “Isha me bukë, jo me benzinë”- pacienti zbulon përplasjen në spitalin e Korçës
• Dyshifohen divorcet në Korçë, ja shkaqet kryesore që sjellin një martesë fiktive