Ujësjellësit 140 milionë euro fatura të papaguara të energjisë

Ministrja e Infrastrukturës dhe Energjisë, Belinda Balluku thotë se rritja e çmimit të energjisë elektrike do të jetë gjëja e fundit që qeveria ‘Rama’ do të bëjë.

Kjo tha ministrja do të ndodhë “vetëm në ndonjë rast ekstrem” dhe synimi është për të ruajtur çmimin aktual për familjet.

Balluku gjatë intervistës për Erla Mëhillin deklaroi se aktualisht humbjet në rrjet të energjisë janë në nivelin 20%, nga 45% që ishte në 2013.

Ministrja përmendi dhe rritjen e arkëtimeve, duke thënë se para 9 vitesh pagesat vileshin në 56%, kurse sot janë në nivelin 97% të faturimit.

Pavarësisht se janë marrë më shumë para nga qytetarët, sërish kompanitë publike për menaxhimin e energjisë janë në vështirësi financiare.

Për krijimin e kësaj situate tha Balluku ndikon fakti që ujësjellësit kanë një borxh prej 140 milionë euro.

Pavarësisht kësaj, Balluku tha se nuk do të ketë ndërprerje të furnizimit me energji për ujësjellësit.

“Problematikë mbeten ujësjellësit që kanë borxhet më të mëdha në pagesën energjisë elektrike. Do të rrisim performancën e ujësjellësve, nuk do t’u ndërpresim energjinë”, tha ministrja.