Ukraina gati të diskutojë me Rusinë miratimin e statusit neutral

Volodimir Zelenski ka deklaruar se Ukraina është e përgatitur të diskutojë me Rusinë miratimin statusit neutral.

Ai dha një intervistë për mediat e pavarura ruse ku tregoi se mund të bëhet pjesë e një marrëveshje paqeje me Rusinë, ku do të diskutohet dhe miratimi i statusit, por me kusht që kjo marrëveshje të garantohet nga palët e treta dhe të bëhet një referendum.

Gjatë intervistës, Zelenski u shpreh se pushtimi rus ka shkatërruar edhe qytete që flasin rusisht në Ukrainë.

Përdorimi i gjuhës ruse në Ukrainë është diçka që është diskutuar gjatë bisedimeve të paqes midis Ukrainës dhe Rusisë, raporton Reuters, por presidenti ukrainas sqaroi se Ukraina ka refuzuar të diskutojë kërkesat e tjera ruse, siç është çmilitarizimi i Ukrainës.

Ndërkohë, Rusia ka kërkuar që mediat atje të mos e transmetojnë intervistën e Zelenskit.

Rusia ka kërkuar vazhdimisht çmilitarizimin e Ukrainës si dhe ndalimin e përpjekjeve të saj për t’u bërë anëtare e NATO-s. Raundi tjetër i bisedimeve mes dy vendeve pritet të zhvillohet të hënën në Turqi.

LEXONI GJITHASHTU:

• Çfarë ka ndodhur në Ukrainë 24 orët e fundit?
• Sa kohë i duhet Katarit për të zëvendësuar Rusinë në furnizimin me energji?