Ukraina mbledh trupat e vrarë të ushtarëve rusë

Trupat e ushtarëve rusë të vrarë në Ukrainë u sollën në një oborr hekurudhor jashtë Kievit dhe qindra të tjerë u grumbulluan në një tren frigoriferik.

Oficeri kryesor i ndërlidhjes civilo-ushtarake, Volodymyr Lyamzin ka deklaruar se “shumica e tyre u sollën nga rajoni i Kievit, rajoni i Chernihiv si dhe nga disa rajone të tjera”, raporton Reuters.

Ai tha se trenat frigoriferikë të stacionuar në rajone të tjera anembanë Ukrainës po përdoren për të njëjtin qëllim.

Një ditë më parë, ushtria e Ukrainës publikoi fotografi ajrore të mbetjeve të djegura dhe të braktisura të një kolone të blinduar ruse të kapur duke u përpjekur të kalonte një lumë në rajonin e Donbasit, i cili është bërë fusha kryesore e betejës.

Reuters nuk mundi të verifikonte raportin ukrainas, por Ministria Britanike e Mbrojtjes ka deklaruar se një urë dhe një pjesë e batalionit të blinduar ishin shkatërruar në lumin Siverskyi Donets, teksa forcat ruse po përpiqeshin të depërtonin në mbrojtjen diku tjetër në Donbas.

LEXONI GJITHASHTU

• Rusia po përdor urinë si kërcënim, sipas Zelenskit
• Rusia ka shkatërruar mbi 100 spitale, prentendon zyrtari ukrainas